„ოფთალმოლოგიის ეროვნულ ცენტრში“ დიაბეტური თვალის, ბადურის ქირურგიისა და თვალის ტრავმული დაზიანებების ცენტრი შეიქმნა
თბილისი 3 დეკემბერი, 2020
„ოფთალმოლოგიის ეროვნულ ცენტრში“ თვალის დიაბეტური დაზიანებისა და ბადურის დაავადებების სამკურნალო ცენტრი შეიქმნა, რომელიც 24 საათის განმავლობაში ფუნქციონირებს და პაციენტებს როგორც გეგმიური, ასევე გადაუდებელი ქირურგიული და თერაპიული მომსახურებით უზრუნველყოფს.
„ოფთალმოლოგიის ეროვნული ცენტრი“ ერთადერთი კლინიკაა საქართველოში, რომელიც დაკომპლექტებულია თვალის უკანა საკანზე სპეციალიზებული ორი ოფთალმოქირურგით და თვალის ტრავმულ დაზიანებებზე სპეციალიზებული ქირურგების მრავალრიცხოვანი გუნდით. პაციენტებს ემსახურებიან ქართველი და უცხოეთიდან მოწვეული ოფთალმოქირურგები, რომელთაც გააჩნიათ მრავალწლიანი გამოცდილება ისეთი დაავადებების მკურნალობის მიმართულებით, როგორიც არის ბადურის ჩამოცლა, დიაბეტური რეტინოპათია, უცხო სხეული მინისებრ სხეულში, თვალის ტრავმული დაზიანება და სხვ.
ცენტრს თვალის დაავადებათა მკურნალობის საუკუნოვანი გამოცდილება გააჩნია და ქვეყნის მასშტაბით ლიდერია გლაუკომის, კატარაქტის, ბადურის ქირურგიის, სიელმეების, თვალის ონკო-ქირურგიის და სხვა ოფთალმოლოგიური ჩარევების მიმართულებით. „ოფთალმოლოგიის ეროვნული ცენტრი“ 2011 წლიდან „ნიუ ჰოსპიტალსში“ ფუნქციონირებს და საუკეთესო ოფთალმოლოგიური სერვისებით უზრუნველყოფს პაციენტებს, მათ შორის გადაუდებელი ოფთალმოლოგიური დახმარების მომსახურებას, რომელიც 24 საათის განმავლობაშია ხელმისაწვდომი.
