ხარისხობრივი და რაოდენობრივი შემადგენლობა
ფრაქსიპარინი - კალციუმის ნადროპარინის საინექციო ხსნარი 9500 ანტი-Xa სე წინასწარ შევსებული მზა შპრიცებისა (0,3მლ, 0,4მლ, 0,6მლ, 0,8მლ) და მულტი დოზირების ფლაკონის (5მლ) სახით.

 

დანიშვნის ჩვენებები
თრომბოემბოლიური გართულებების პროფილაქტიკა ზოგად და ორთოპედიულ ქირურგიულ პაციენტებში; ინტენსიური თერაპიის განყოფილებაში ჰოსპიტალიზებული არაქირურგიული პაციენტების მაღალი თრომბოემბოლიური რისკით (სუნთქვის უკმარისობა და/ან რესპირაციული ინფექციები და/ან გულის უკმარისობა); თრომბოემბოლიური გართულებების მკურნალობა; სისხლის შედედების პროფილაქტიკა ჰემოდიალიზის დროს.

 

მიღების გზები და დოზირება
მკურნალობის პროცესში არ შეიძლება კალციუმის ნადროპარინის გამოყენება სხვა დმჰ-თან მონაცვლეობით. კალციუმის ნადროპარინი კუნთში არ კეთდება. კანქვეშა ინექციის ჩვეული ადგილია მუცლის კედლის მარჯვენა ან მარცხენა ლატერალური მიდამო, ასევე ალტერნატიულად შეიძლება გაკეთდეს ბარძაყზეც. ნემსი კეთდება პერპენდიკულარულად ხელით წამოწეულ კანის ნაკეცში. არ არის რეკომენდებული ინექციამდე შპრიციდან ჰაერის ბუშტის გამოდევნა. არ შეიძ₾ება ინექციის ადგილის დაზელვა. თრომბოემბოლიური პათოლოგიების პროფილაქტიკა ზოგად ქირურგიაში: ფრაქსიპარინის რეკომენდებული დოზაა 0,3მლ (2850 ანტი-Xa სე). ინექცია კეთდება კანქვეშ ქირურგიულ ჩარევამდე 2-4 საათით ადრე, შემდგომში ყოველდღიურად დღეში ერთხელ. მკურნალობა უნდა გაგრძელდეს სულ მცირე 7 დღე და რისკის არსებობის მთელი პერიოდის განმავლობაში. ორთოპედიული ქირურგია: საწყისი დოზა მიიღება ოპერაციამდე 12 საათით ადრე და მეორე - ოპერაციის დასრულებიდან 12 საათის შემდეგ. მკურნალობის მინიმალური ხანგრძლივობაა 10 დღე. ინტენსიური თერაპია: დოზირება ხდება წონის გათვალისწინებით და მკურნალობა გრძელდება თრომბოემბოლიის რისკის მთელ პერიოდში.

 

უკუჩვენებები
ჰიპერმგრძნობელობა ნადროპარინის ან ნადროპარინის საინექციო ფორმის ნებისმიერი კომპონენტის მიმართ; ანამნეზში ნადროპარინთან დაკავშირებული თრომბოციტოპენია; აქტიური სისხლდენა ან ჰემორაგიის გაზრდილი რისკი, დაკავშირებული ჰემოსტაზის პათოლოგიასთან; ჰემორაგიული ინსულტი, მწვავე ინფექციური ენდოკარდიტი; თირკმლის მძიმე უკმარისობა; ნადროპარინი არ არის რეკომენდებული ბავშვებსა და მოზარდებში.

 

თირკმლის დაზიანება
არ საჭიროებს დოზის კორექციას თირკმლის მსუბუქი უკმარისობის დროს. თირკმლის საშუალო და მძიმე დაზიანებისას რეკომენდებულია ნადროპარინის დოზის შემცირება.

 

სიფრთხილის ზომები
თრომბოციტოპენია; ღვიძლის უკმარისობა; მძიმე არტერიული ჰიპერტენზია; ანამნეზში წყლულოვანი დაავადებისა ან სხვა ორგანული დაზიანების არსებობა სისხლდენით; ქორიო-რეტინული სისხლძარღვების პათოლოგია; ლატექსზე ალერგია

ურთიერთქმედება სხვა პრეპარატებთან: ნადროპარინი სიფრთხილით გამოიყენება პაციენტებში, რომლებიც იღებენ ორალურ ანტიკოაგულანტებს, სისტემურ გლუკოკორტიკოსტეროიდებს და დექსტრანებს.

 

ორსულობა და ლაქტაცია
ორსულებში ფრაქსიპარინის გამოყენება ხდება მხოლოდ პაციენტის რისკი - სარგებელთან თანაფარდობის შეფასების მიხედვით. შეზღუდულია მონაცემები ნადროპარინის დედის რძეში ექსკრეციის შესახებ. ამდენად, ლაქტაციის პერიოდში ნადროპარინის გამოყენება არ არის რეკომენდებული.

 

გვერდითი მოვლენები
ხშირი: სხვადასხვა ლოკალიზაციის ჰემორაგიული მანიფესტაციები. იშვიათი: თრომბოციტოპენია; ინექციის ადგილას კალცინოზი.

 

ჰიპერდოზირება
ჰიპერდოზირების ძირითად კლინიკურ ნიშანს სისხლდენა წარმოადგენს. მხოლოდ სერიოზულ შემთხვევებში განიხილება პროტამინ სულფატის გამოყენების საკითხი.

 

სარეგისტრაციო მოწმობა
0,3მლ წინასწარ შევსებული მზა შპრიცი - 016101, 0,4მლ - 016102, 0,6მლ - 016103, 0,8მლ -016104, მულტიდოზა ფლაკონი - 016206.

 

*პრეპარატის გამოყენების წინ იხილეთ ფრაქსიპარინის სამედიცინო გამოყენების სრული ინსტრუქცია.