შემადგენლობა: აქტიური ნივთიერება:

დილთიაზემის ჰიდროქლორიდი 60მგ; პროლონგირებული მოქმედების, გარსით დაფარული ტაბლეტები 120მგ;

 

დამხმარე ნივთიერებები:

ლაქტოზის მონოჰიდრატი, ჰიდროგენიზებული აბუსალათინის ზეთი, კოლოიდური ალუმინის ჰიდროქსიდი, პოლიაკრილატი, ტალკი, მაგნიუმის სტეარატი, ჰიდროქსიპროპილმეთილცელულოზა, საქაროზა, ტიტანის დიოქსიდი (E171), პოლისორბატი 80, გლიცერინი 85%.

 

აღწერილობა:

60მგ ტაბლეტები: თეთრი ფერის კაფსულის მსგავსი, გარსით დაფარული ტაბლეტები ორივე მხარეს დანაყოფიანი ნაჭდევით და ცალ მხარეს კოდით DL60. 120მგ ტაბლეტები: თეთრი ფერის კაფსულის მსგავსი, გარსით დაფარული ტაბლეტები ორივე მხარეს დანაყოფიანი ნაჭდევით და ცალ მხარეს კოდით DL120.

 

ფარმაკოთერაპიული ჯგუფი:

კალციუმის "ნელი" არხების ბლოკატორიები.

 

ჩვენება:

- არტერიული ჰიპერტენზიის მკურნალობა; - დაძაბვისა და პრინცმეტალის სტენოკარდიის მკურნალობა და პროფილაქტიკა; - გულის რითმის დარღვევის (პაროქსიზმული ტაქიკარდია, წინაგულების ციმციმი და თრთოლვა, სუპრავენტრიკულური ტაქიარითმია) პროფილაქტიკა.

 

უკუჩვენებები:

- მომატებული მგრძნობელობა პრეპარატის ან ბენზოდიაზეპინების სხვა წარმოებულების მიმართ; - მკვეთრად გამოხატული ბრადიკარდია; - II და III ხარისხის სინოატრიული ან ატრიოვენტრიკულური ბლოკადა (კარდიოსტიმულატორის მქონე პაციენტების გარდა); - სინუსური კვანძის სისუსტის სინდრომი ხელოვნური რითმის მატარებლის გამოყენების გარეშე; - ვოლფ-პარკინსონ-უაიტის სინდრომი; - გულის უკმარისობა (დეკომპენსაციის სტადია); - მიოკარდიუმის ინფარქტი მარცხენა პარკუჭის უკმარისობის ნიშნებით; - გულის უკმარისობა (მათ შორის უახლოეს პერიოდში მიოკარდიუმის ინფარქტის გადატანის დროს); - არტერიული ჰიპოტენზია (სისტოლური წნევა 90მმ ვერცხლის წყლის სვეტზე ნაკლები); - ორსულობა და ლაქტაციის პერიოდი; - პარკუჭოვანი ტაქიკარდია Qღშ ფართო კომპლექსით; - 18 წლამდე ასაკი (ეფექტურობა და უსაფრთხოება დადგენილი არ არის). დილთიაზემი განსაკუთრებული სიფრთხილით ინიშნებათ ღვიძლისა და თირკმელების ფუნქციის გამოხატული დარღვევის, მწვავე პორფირიის, პარკუჭშიდა გამტარებლობის დარღვევის, I ხარისხის AV ბლოკადის დროს.

 

მიღების წესი და დოზირება:

პერორალურად ტაბლეტების მიღება ხდება დაუღეჭავად, მცირე რაოდენობით წყალთან ერთად. პრეპარატის დოზები ინდივიდუალურია. საშუალო სადღეღამისო დოზაა 180-240მგ. განსაკუთრებული სიფრთხილეა საჭირო (სტაციონალურ პირობებში) პრეპარატის დანიშვნისას 360მგ-ზე მეტი სადღეღამისო დოზით. კარდილის 120მგ პროლონგირებული მოქმედების გარსით დაფარული ტაბლეტები: 1ტაბ. 2-ჯერ დღეში. საწყისი დოზა-90მგ 2-ჯერ დღეში. თერაპიული ეფექტის მიხედვით შესაძლებელია დოზის გაზრდა 180მგ-მდე 2-ჯერ დღეში. აუცილებლობის შემთხვევაში შესაძლებელია ტაბლეტების შუაზე გაყოფა. კარდილის 60მგ გარსით დაფარული ტაბლეტები: 1 ტაბ. 3-4-ჯერ დღეში. ძირითადად საწყისი დოზაა 60მგ 3 ან 4-ჯერ დღეში. თერაპიული ეფექტის მიხედვით შესაძლებელია დოზის გაზრდა 120მგ-მდე 3-ჯერ დღეში. 60 წლის ასაკს გადაცილებულ პაციენტებში კარდილი ინიშნება 60მგ-ს ოდენობით 3-ჯერ დღეში. ხანდაზმულ ან ღვიძლის პათოლოგიის მქონე პაციენტებში მკურნალობის დაწყება რეკომენდებულია შედარებით დაბალი დოზებით (12 ტაბ. ) 2-ჯერ დღეში. ბავშვებში პრეპარატის გამოყენების შესახებ მონაცემები არ არსებობს.

 

გვერდითი მოქმედება:

კარდილი, ჩვეულებრივ, კარგად გადაიტანება. შესაძლებელია-თავის ტკივილი, თავბრუსხვევა, საერთო სისუსტე, გადაღლილობა, კანის ალერგიული რეაქციები (ქავილი, კანის ჰიპერემია, ეკზანთემა, შეშუპება). ერთეულ შემთხვევებში შესაძლებელია ალერგიული რეაქციები ექსუდაციური მულტიფორმული ერითემის, ლიმფადენოპათიის ან ეოზინოფილიის სახით. იშვიათ შემთხვევებში აღინიშნება ცვლილებები კუჭ-ნაწლავის ტრაქტის მხრივ: გულისრევა, ღებინება, გულძმარვა, დიარეა, ყაბზობა; ღვიძლის ტრანსამინაზების და ტუტე ფოსფატაზას აქტივობის ტრანზიტორული მომატება, როგორც ღვიძლის მძიმე დაზიანების ნიშანი. ამიტომ აუცილებელია ღვიძლის ფუნქციის რეგულარული კონტროლი. დილთიაზემის მაღალ დოზებში გამოყენებისას შესაძლებელია მკვეთრად გამოხატული ბრადიკარდია, გულის გამტარებლობის დარღვევა (ატრიოვენტრიკულური და სინოატრიული ბლოკადა), არტერიული ჰიპოტონია, გულის უკმარისობის სიმპტომების განვითარება, ფილტვების შეშუპება, პარესთეზიები, ტრემორი და მხედველობის დარღვევა. ცალკეულ შემთხვევებში შესაძლებელია: უძილობა, დეპრესიული მდგომარეობა, ჰალუცინაციები, პოტენციის დარღვევა. პრეპარატის ხანგრძლივი გამოყენების დროს ადგილი აქვს ღრძილების ჰიპერპლაზიის განვითარების ერთეულ შემთხვევებს.

 

დოზის გადაჭარბება:

მოზრდილებში დილთიაზემის 0,9-1,8გ დოზებში გამოყენება იწვევს სხვადასხვა ხარისხის სიმძიმის ინტოქსიკაციას. პრეპარატის 2,6გ დოზით გამოყენება ხანდაზმული ასაკის პაციენტებში და 5,9გ დოზით-მოზრდილებში შესაძლებელია გახდეს სერიოზული, ხოლო 10,8გ-ძალიან სერიოზული ინტოქსიკაციის მიზეზი. მოწამვლის სიმპტომები იწყება პრეპარატის მიღებიდან 8სთ-ის განმავლობაში. მწვავე ინტოქსიკაციის კლინიკური სურათი მიმდინარეობს არტერიული წნევის მკვეთრი დაქვეითებით, დამთავრებული კოლაფსით, სინუსური ბრადიკარდიით ატრიოვენტრიკულური რითმის იზორითმული დისოციაციის გარეშე, AV გამტარებლობის დარღვევით. აღნიშნული ეფექტების შემთხვევაში საჭიროა კუჭის ამორეცხვა, ოსმოსური დიურეზი. კლინიკური ნიშნებით მიმდინარე არტერიული წნევის მკვეთრად დაქვეითების დროს საჭიროა დოპამინის (დოფამინის) ან დობუტამინის, კალციუმის ქლორიდის, იზოპროტერენოლის (იზადრინის) ან ნორეპინეფრინის (ნორადრენალინის) ვენაში შეყვანა. ტაქიკარდიის დროს, გულის სწრაფი რითმით ანტეროგრადული გამტარებლობის მქონე ავადმყოფებში წინაგულების თრთოლვის ან ციმციმის დროს და ვოლფ-პარკინსონ-უაიტის ან ლაუნ-განონგ-ლევინის სინდრომით მიმდინარე დამატებითი გამტარებლობის დროს ნაჩვენებია ელექტროიმპულსური თერაპია, ლიდოკაინის ან პროკაინამიდის ვენაში შეყვანა, სითხეების ვენაში ნელი წვეთოვანი ინფუზია. ბრადიკარდიის დროს (იშვიათად- II და III ხარისხის ატრიოვენტრიკულური ბლოკადა, რომელიც ზოგიერთ ავადმყოფებში მიმდინარეობს ასისტოლიით) ნაჩვენებია ატროპინის, იზოპროტერენოლის, კალციუმის ქლორიდის ვენაში შეყვანა ან ელექტროკარდიოსტიმულატორის გამოყენება.

 

სხვა სამკურნალო პრეპარატებთან ურთიერთქმედება:

დილთიაზემი აძლიერებს სხვა ანტიჰიპერტენზიული ან დიურეზული საშუალებების მოქმედების ეფექტს. ბეტა-ადრენობლოკატორების და დილთიაზემის კომბინაციისას შესაძლებელია AV ბლოკადის გაძლიერება და ბრადიკარდიის განვითარება. -პრეპარატი ამცირებს ნიფედიპინის კლირენსს, ზოგიერთ შემთხვევებში 50%-ზე უფრო მეტად; -ზრდის პროპრანოლოლის და მეტოპროლოლის კონცენტრაციას სისხლის პლაზმაში, ღვიძლში მათი მეტაბოლიზმის შემცირების გზით; -ზრდის დიგოქსინის კონცენტრაციას სისხლის პლაზმაში 20%-დან 50%-მდე მისი კლირენსის შემცირების გზით (საჭიროა სისხლის შრატში დიგოქსინის კონცენტრაციის კონტროლი); -ზრდის ან ახანგრძლივებს მიდაზოლამის და ტრიაზოლამის სედატიურ ეფექტს ღვიძლში მათი მეტაბოლიზმის შემცირების გზით; -დიაზეპამი ამცირებს დილთიაზემის კონცენტრაციას სისხლის პლაზმაში დაახლოებით 20%-მდე მისი შეწოვის შემცირების გზით. -ციმეტიდინი აძლიერებს დილთიაზემის აბსორბციას ღვიძლში ამ უკანასკნელის პირველადი მეტაბოლიზმის შემცირების გზით (აღნიშნული კომბინაციის კლინიკური მნიშვნელობა უცნობია); -ზრდის ციკლოსპორინის კონცენტრაციას სისხლის პლაზმაში 50%-მდე, ამავე დროს ციკლოსპორინის მეტაბოლიზმის შემცირების გზით აძლიერებს მის ნეფროტოქსიკურობას; -ამიოდარონთან კომბინაცია გავლენას ახდენს AV გამტარებლობაზე; -კალციუმის პრეპარატების ვენაში შეყვანა ამცირებს დილთიაზემის ფარმაკოლოგიურ ეფექტს; -ზრდის კარბამაზეპინის და იმიპრამინის კონცენტრაციას სისხლის პლაზმაში; -მნიშვნელოვნად ზრდის ბუსპირონის კონცენტრაციას სისხლის პლაზმაში. ექსპერიმენტული კვლევებით დადგენილია, რომ დილთიაზემი მწეველ მამაკაცებში ამცირებს თეოფილინის კლირენსს 25%-მდე. ცხოველებზე ჩატარებული კვლევების შედეგად დადგენილია, რომ დილთიაზემი აძლიერებს ჰალოტანის და იზოფლურანის კარდიოსუპრესიულ ეფექტს. ადამიანებში აღნიშნული ურთიერთქმედება აღწერილი არ არის. მკურნალობის დასაწყისში შესაძლებელია თავბრუსხვევა, განსაკუთრებით სხეულის მდგომარეობის შეცვლისას. ამიტომ აღნიშნულ ეტაპზე ავტოტრანსპორტის მართვა და იმ სამუშაოების შესრულება, რომლებიც გაძლიერებულ ყურადღებას და სწრაფ რეაქციებს მოითხოვს ნებადართული არ არის. მკურნალობის ბოლო ეტაპზე, კარგი თერაპიული ეფექტის მიღწევისას, დილთიაზემის ზემოქმედება სატრანსპორტო საშუალებების მართვის უნარზე ცნობილი არ არის.

 

გამოშვების ფორმა:

30 ან 100 ტაბ. მუქი ფერის მინის ფლაკონებში. ინახება 15-25C ტემპერატურაზე, ბავშვებისაგან დაცულ ადგილას.

 

ვარგისიანობის ვადა:

3 წელი. დაუშვებელია პრეპარატის გამოყენება ვარგისიანობის ვადის გასვლის შემდეგ. გაიცემა რეცეპტით

 

მწარმოებელი:

"ORION" ფინეთი