ზოგადი დახასიათება:

საერთაშორისო და ქიმიური სახელწოდება: ფენიტოინი, 5.5-დიფენილჰიდანტოინისა და ნატრიუმის ჰიდროკარბონატის ნარევი შეფარდებით 85 : 15; ძირითადი ფიზიკურ-ქიმიური თვისებები: თეთრი ან თითქმის თეთრი ფერის ტაბლეტები; შემცველობა: 1 ტაბლეტი შეიცავს 0.117 გ ფენიტოინს (დიფენინს); დამხმარე ნივთიერებები: ნატრიუმის ჰიდროკარბონატი, კარტოფილის სახამებელი, ტალკი, კალციუმის სტეარატი.

 

გამოშვების ფორმა:

ტაბლეტები.

 

ფარმაკოლოგიური ჯგუფი:

კრუნჩხვის საწინააღმდეგო საშუალებები, ჰიდანტოინის წარმოებულები. ATC N03A B02.

 

ფარმაკოლოგიური თვისებები:

დიფენინი ავლენს კრუნჩხვის საწინააღმდეგო მოქმედებას გამოხატული საძილე ეფექტის გარეშე. დიფენინის კრუნჩხვის საწინააღმდეგო მოქმედების მექანიზმი ბოლომდე დადგენილი არ არის. ითვლება, რომ დიფენინის სპეციფიური გავლენა რეალიზდება ეპილეფსიისას ეპილეფსიის კერის ნეირონების აგზნებადობის შემცირების გზით და ნეირომედიატორებზე ზემოქმედებით. პრეპარატი ახდენს ნატრიუმის არხების ბლოკირებას, ახანგრძლივებს მათი ინაქტივაციის დროს, ახდენს მაღალი სიხშირის განმუხტვების გენერაციისა და გავრცელების პრევენციას. პრეპარატი ასევე ავლენს ანტიარითმიულ მოქმედებას. დიფენინის ანტიარითმიული მოქმედება, შესაძლოა, განპირობებულია ნატრიუმისა და კალციუმის იონების გულის პურკინიეს ბოჭკოების უჯრედებში შეღწევის მოწესრიგებით. პრეპარატი თრგუნავს ჰისის კონის პურკინიეს სისტემაში მოქმედების პოტენციალის ხანგრძლივობას და ანომალურ ავტომატიზმს რეპოლარიზაციის დროის შემცირების ხარჯზე, ამცირებს ეფექტურ რეფრაქტერულ პერიოდს.

 

ფარმაკოკინეტიკა:

შიგნით მიღებისას კარგად შეიწოვება და სწრაფად ნაწილდება ორგანოებსა და ქსოვილებში. აღწევს ზურგის ტვინის სითხეში, ნერწყვში, სპერმაში, კუჭისა და ნაწლავის წვენში, ნაღვლის წვენში, დედის რძეში, ასევე აღწევს პლაცენტაში. მნიშვნელოვნად (90%-მდე და მეტი) უკავშირდება პლაზმის ცილებს. სისხლის შრატში პრეპარატის მაქსიმალური კონცენტრაციის მიღწევის დრო შეადგენს 1.5-3 საათს. სისხლის შრატში პრეპარატის თერაპიული კონცენტრაციისას 10-20 მკგ/მლ (40-80 მკმოლი/ლ). სტაბილური კონცენტრაცია მიიღწევა მე-5-10 დღეს დღე-ღამის საშუალო დოზის მიღების შემთხვევაში. თერაპიული ეფექტის მისაღწევად აუცილებელი დიფენინის კონცენტრაცია შრატში შეიძლება დამოკიდებული იყოს ეპილეფსიური შეტევების ხარისხზე. ზოგიერთ შემთხვევაში შესაძლებელია ეპილეფსიური შეტევების არიდება, როდესაც შრატში ფენიტოინის კონცენტრაცია შეადგენს 6-9 მკგ/მლ (24-36 მკმოლი/ლ). ამგვარად, მკურნალობის ეფექტურობის კონტროლი უნდა მოხდეს არა შრატში პრეპარატის კონცენტრაციის, არამედ დაავადების კლინიკური მაჩვენებლების მიხედვით. დიფენინი მეტაბოლიზდება ღვიძლის ფერმენტების მიერ არააქტიურ მეტაბოლიტებამდე. ძირითადი არააქტური მეტაბოლიტი - 5-(პ-ჰიდროქსიფენილ)-5-ფენილგიდანტოინი. ნახევარგამოყოფის პერიოდი შეადგენს 30 საათს. შესაძლებელია პრეპარატის კუმულაცია და როგორც შედეგი - მოულოდნელი ტოქსიური ეფექტების განვითარება. პრეპარატის დაახლოებით 5% გამოიყოფა თირკმელებით უცვლელი სახით.

 

გამოყენების ჩვენებები:

დიფენინი ინიშნება ეპილეფსიის, უპირატესად დიდი ეპილეფსიური შეტევების (გრანდ მალ) სამკურნალოდ, რომლებსაც თან ახლავს გონების დაკარგვა, უნებლიე შარდვა, ტონური კრუნჩხვები, რომლებიც კლონურში გადადის. გარდა ამისა, პრეპარატის დანიშვნა შეიძლება გულის არითმიების დროს, რომლებიც განპირობებულია საგულე გლიკოზიდების ჭარბი დოზით, მენიერის სინდრომის ზოგიერთი ფორმებისას (ვესტიბულარული რეფლექსების დათრგუნვა).

 

გამოყენების წესი და დოზები:

დიფენინი გამოიყენება შიგნით ჭამის დროს ან ჭამის დასრულებისთანავე. ერთჯერადი დოზა მოზრდილებისათვის - 1/2-1 ტაბლეტი. მიიღება 2-3-ჯერ დღე-ღამეში. ჩვენებების მიხედვით დღე-ღამის დოზა იზრდება 3-4-ტაბლეტამდე. უმაღლესი დოზები მოზრდილებისათვის: ერთჯერადი - 3 ტაბლეტი, დღე-ღამის - 8 ტაბლეტი. გამოყენება ბავშვებში: 5 წლამდე - 1/4 ტაბლეტი 2-ჯერ დღე-ღამეში, 5-8 წლის - 1/4 ტაბლეტი 3-4-ჯერ დღე-ღამეში, 8 წელზე უფროს ბავშვებში - 1/2 ტაბლეტი 2-ჯერ დღე-ღამეში.

 

გვერდითი მოქმედება:

შესაძლებელია თავბრუსხვევა, აგზნებადობა, ღებინება, გულისრევა, სუნთქვის გართულება, ტრემორი, ატაქსია, კანის ალერგიული რეაქციები, ჰირსუტიზმის მოვლენები, ლიმფოადენოპათია, ღრძილების ჰიპერპლაზია. გამოხატული გვერდითი მოვლენების დროს დოზა თანდათან მცირდება და დიფენინის გამოყენება წყდება.

 

უკუჩვენებები:

გულის უკმარისობა (ადამს-სტოქსის სინდრომი), II-III ხარისხის ატრიოვენტრიკულარული ბლოკადა, ბრადიკარდია, თირკმელების, ღვიძლის დაავადებები, ორსულობა, კახექსია, პორფირია, ინდივიდუალური ჰიპერმგრძნობელობა პრეპარატის კომპონენტების მიმართ. პრეპარატის დანიშვნა ორსულობის დროს არ შეიძლება, გარდა იმ შემთხვევებისა, როდესაც დედისათვის სარგებელი აღემატება ნაყოფისათვის რისკს. დიფენინი ექსკრეტირდება დედის რძეში, ამიტომ მეძუძური დედებისათვის დანიშვნა რეკომენდებული არ არის.

 

ურთიერთქმედება სხვა სამკურნალო საშუალებებთან:

იზონიაზიდი და მისი წარმოებულები, ლევომიცეტინი, კუმარინები, აცეტილსალიცილის მჟავა, ტეტურამი თრგუნავენ დიფენინის ბიოტრანსფორმციას და შეუძლიათ გააძლიერონ მისი გვერდითი მოქმედება. ცნს-ის დამთრგუნველ პრეპარატებთან ერთად გამოყენებისას შესაძლებელია დეპრესიის გაძლიერება; პარაცეტამოლთან ერთად - ჰეპატოტოქსიური მოქმედება; ანტიჰისტამინურ პრეპარატებს შეუძლიათ დიფენინის კონცენტრაციის მომატება სისხლის პლაზმაში.

 

ჭარბი დოზა:

პრეპარატის ჭარბი დოზის შემთხვევაში შესაძლებელია ტოქსიური გვერდითი ეფექტების გაძლიერება. ვინაიდან ჭარბი დოზის სამკურნალოდ სპეციფიური საშუალებები არ არსებობს, რეკომენდებულია უპირველეს ყოვლისა აქტივირებული ნახშირისა და საფაღარათო სამკურნალო საშუალებების გამოყენება და სიმპტომატური მკურნალობა. ხანგრძლივი გამოყენებისას შესაძლებელია ჰიპერმგრძნობელობის გამოვლინება, ცნს-ს გამოხატული დათრგუნვა, რაც საჭიროებს პრეპარატის მიღების შეწყვეტას.

გამოყენების განსაკუთრებულობანი:

პრეპარატის გამოყენებისას ბავშვებში ზრდის პერიოდში იზრდება შემაერთებელი ქსოვილის მხრივ გვერდითი ეფექტების განვითარების რისკი. პრეპარატის მიღების უეცარი შეწყვეტისას შესაძლებელია ადგილი ჰქონდეს მო სინდრომს. ავადმყოფებისათვის ღვიძლის ფუნქციის დარღვევით და ხანდაზმული პირებისათვის აუცილებელია დოზირების რეჟიმის კორექცია. მწვავე ალკოჰოლური ინტოქსიკაციისას დიფენინის კონცენტრაცია იზრდება, ქრონიკულისას - მცირდება. მკურნალობის პერიოდში ნელდება ფსიქომოტორული რეაქციები, რაც უნდა გაითვალისწინონ პირებმა, რომელთა საქმიანობა მოითხოვს ძლიერ ყურადღებას.

 

შენახვის პირობები და ვადა:

მშრალ, სინათლისაგან დაცულ ადგილას. შენახვის ვადა - 4 წელი. ინახება ბავშვებისათვის მიუწვდომელ ადგილას.

 

გაცემის პირობები:

რეცეპტით.

 

შეფუთვა:

10 ტაბლეტი კონტურულ დანაყოფების გარეშე შეფუთვაში.

 

მწარმოებელი:

რსს "ლუგანსკის ქიმიურ-ფარმაცევტული ქარხანა". მისამართი. 91019, ქ. ლუგანსკი, კიროვის ქ., 17, უკრაინა.