შემადგენლობა :

ალერტეკის ერთი ტაბლეტი შეიცავს აქტიური ნივთიერების - ცეტირიზინის დიჰიდროქლორიდის 0.01 გ-ს.

 

მოქმედების მექანიზმი :
ალერტეკი - ანტიჰისტამინური პრეპარატია, ახასიათებს ალერგიის საწინააღმდეგო მოქმედება. H1-ჰისტამინორეცეპტორების სელექციური ანტაგონისტი (ბლოკატორი) არ ახდენს მნიშვნელოვან ანტიქოლინერგულ და ანტისეროტონინულ გავლენას. თერაპიული დოზით პრაქტიკულად არ იწვევს სედატიურ ეფექტსა და ძილიანობას. პრეპარატი მოქმედებს ალერგიული რეაქციის "ადრეულ" - ჰისტამინდამოკიდებულ სტადიასა და "გვიან" - უჯრედულ სტადიაზე; ამცირებს ეოზინოფილების მიგრაციასა და ადჰეზიის მოლეკულების (ICAM-1 და VCAM-1) ექსპრესიას, რომლებიც წარმოადგენენ ალერგიული ანთებითი რეაქციის მარკერებს. თრგუნავს ჰისტამინის სეკრეციის სხვა მედიატორებსა და ინდუქტორებს, როგორიცაა PAF (თრომბოციტების მააქტივირებელი ფაქტორი) და P სუბსტანცია. ამცირებს მსუბუქი მიმდინარეობის ბრონქული ასთმის ჰისტამინინდუცირებულ ბრონქოობსტუქციას, ახასიათებს კანის რეაქციის მიმართ მაღალი მაინჰიბირებელი მოქმედება, ვერ გადის ჰემატოენცეფალურ ბარიერს და პრაქტიკულად არ მეტაბოლიზირდება ღვიძლში. სისხლის პლაზმაში პრეპარატის მაქსიმალური კონცენტრაცია მიიღწევა მიღებიდან ერთი საათის განმავლობაში, ხოლო კლინიკური ეფექტი ვლინდება მიღებიდან 2 სთ-ის შემდეგ, H1 -რეცეპტორების ბლოკადის ხანგრძლივობა 24 სთ-ზე მეტია. საჭმლის მიღება გავლენას არ ახდენს პრეპარატის აბსორბციის ხარისხზე, თუმცა ახანგრძლივებს მას. თერაპიული კურსის ფონზე არ ვითარდება ტოლერანტობა. ერთჯერადი დოზის მიღების შემდეგ ალერტეკის ნახევარგამოყოფის პერიოდი მოზრდილებში შეადგენს 10 სთ-ს, 6-12 წლამდე ბავშვებში - 6 სთ-ს, ხოლო 2-6 წლამდე ბავშვებში - 5 სთ-ს.

 

ჩვენება :
- სეზონური და ქრონიკული ალერგიული რინიტი;
- ალერგიული კონიუნქტივიტი;
- ქავილით მიმდინარე დერმატოზები;
- ჭინჭრის ციება (ქრონიკული იდიოპათიური ჭინჭრის ციების ჩათვლით), ქვინკეს შეშუპება.

 

უკუჩვენება :
პრეპარატის დანიშვნის უკუჩვენებაა ცეტირიზინისადმი მაღალი მგრძნობელობა, ორსულობისა და ლაქტაციის პერიოდი.

 

უსაფრთხოების ზომები :
ალერტეკი რეკომენდებული დოზით არ აძლიერებს ალკოჰოლის მოქმედებას, თუმცა სიფრთხილის დაცვა აუცილებელია; არ ახდენს გავლენას ფსიქიკურ და მოტორულ რეაქციებზე, მისი მიღება დასაშვებია ავტომობილის მართვისა და სხვა აქტიური სამუშაოს შესრულების დროს (დოზის მომატებისას საჭიროა სიფრთხილე). მკურნალობის დროს აუცილებელია ძუძუთი კვების შეწყვეტა. ალერტეკის მოქმედი ნივთიერება - ცეტირიზინი, გავლენას არ ახდენს სხვა სამკურნალო საშუალებებზე. ცეტირიზინისა და მაკროლიდების ან კეტოკონაზოლის კომბინაცია ელექტროკარდიოგრამაზე არ ავლენს ცვლილებებს.

 

დოზირება და მიღების წესი:
პრეპარატი ინიშნება: მოზრდილებსა და 12 წელზე მეტი ასაკის ბავშვებში დღეში ერთხელ 1 ტაბლეტი (0.01 გ) - დილას; 6-12 წლამდე ბავშვებში - 1 ტაბლეტი (0.01 გ) ერთჯერადად დილას ან 1/2 ტაბლეტი (0.005 გ) დღეში ორჯერ (დილას და საღამოს); 2-6 წლამდე ბავშვებში - 1/2 ტაბლეტი (0.005 გ) ერთ მიღებაზე დილას ან 1/4 ტაბლეტი დღეში ორჯერ (დილას და საღამოს); თირკმლის უკმარისობის მქონე ავადმყოფებში საჭიროა დოზის განახევრება. თირკმლის ნორმალური ფუნქციის მქონე ასაკოვანი პაციენტები დოზის კორექციას არ საჭიროებენ.

 

გვერდითი მოვლენები :

კუჭ-ნაწლავის ტრაქტის მხრივ:
პირის ღრუს სიმშრალე, იშვიათად - საჭმლის მომნელებელი ტრაქტის დისფუნქცია; ცნს-ის მხრივ: შესაძლებელია მცირედ გამოხატული და სწრაფად გარდამავალი ძილიანობა, თავის ტკივილი, თავბრუსხვევა, ერთეულ შემთხვევაში - აგზნებადობა; ალერგიული რეაქციები: იშვიათად - კანზე გამონაყარი ან ანგიონევროზული შეშუპება. გვერდითი მოვლენები ვითარდება იშვიათად და აქვს ტრანზიტორული ხასიათი.

 

ვარგისიანობა და შენახვის პირობები :
პრეპარატის ვარგისიანობის ვადაა 4 წელი, ინახება 10-250C ტემპერატურაზე, სინათლისაგან დაცულ, მშრალ, ბავშვებისათვის ხელმიუწვდომელ ადგილზე!

 

გამოშვების ფორმა :
ტაბლეტი 0.01 გ, შეფუთვაში 10 ან 20 ტაბლეტი.

 

დანიშნულება :
ექიმის რეცეპტის გარეშე!

 

მწარმოებელი ფირმა:
შ.პ.ს. "ჯი-ემ-პი"